強國崛起背後，有一隊默默為人民幣服務嘅特攻隊，佢哋就係無堅不摧嘅「水貨兵團」。數以萬計嘅水貨客精兵繼佔領上水站後，近年向世界出發，用銀彈買起全球奶粉以至名牌精品，以螞蟻搬家精神震懾全球，連帶趕絕他國後代，令人欽敬。
渺小嘅網民聽日舉行今年首次光復上水站行動，但相信作用係零，絕對打唔散水貨兵團，而且水貨客嘅勢力版圖已經擴散到粉嶺、太和、大埔墟同九龍灣站，噚日大埔區議會討論點樣打擊，結論又係冇符。

澳洲BB冇奶粉食

水貨客嘅生命力強頑過小強，日前更榮登澳洲報紙頭版。皆因佢哋為咗強國下一代食到正宗澳洲奶粉，不惜飛越半個地球去搶購，透過皮篋空運或者郵寄帶返鄉下，搞到當地藥房冇晒貨，要實行限購措施，就嚟洋BB都冇奶粉食，見證強國國力幾咁勁。
查實除咗澳洲，荷蘭、新西蘭同加拿大都俾強國水貨客攻陷，奶粉經常短缺，而當地華僑都歸隊，以郵購方式代內地同胞買奶粉，天涯若比鄰，真係感人至深。
水貨客嘅目標又何止奶粉咁簡單，近年巴黎老佛爺商場內，強國人可以隨時踎低食煙，感覺賓至如歸，皆因佢哋用銀彈掃光名牌貨，連巴黎嘅品味都買得起。另一方面，美國感恩節同英國嘅聖誕節都會舉行大減價，當地百貨公司都俾強國人攻陷，據講有人買咗幾世都用唔完嘅奶粉同日用品多到要用貨櫃運返強國，問你怕未？