七一精神繼續發功，區議會選舉餘波未了，民主派要求取消區議會委任議席。
民建聯雖然重創，但仍有委任議席可以開後門。雖然，喺區議會選舉歷史上，好似未試過委任直選嘅落敗人士，不過，喺特區年代，喺人類史上未曾試過嘅嘢，冇人敢包呢個政府一定唔會試，所以民建聯議員就算直選落敗，可以透過委任嘅後門倒轉頭入番，呢一樣，係政府「行政主導」嘅權力範圍，吹咩？

鄔維庸可能僅一票
何況，政府可以聲大大咁話：就算委任番葉國謙做區議員，葉國謙點都有一千幾票選民支持，如果委任鄔維庸，就只係得阿董一票，咁係一千幾票「民主」，定係委任嗰一票「民主」？
若果拗到咁，又有古講：若然係直選落敗嘅都可以委任，咁就要按「比例代表制」精神委任，即是委任葉國謙，得，不過同時又要委任埋長毛梁國雄。最後，盞咪又嘈到上國家嘅層面，由阿爺定奪，即是曾慶紅話事：葉國謙得，長毛唔得；或者兩個都得，不過要同時搭多件鄔維庸。嗰陣時，咪盞又谷多一鑊五十萬人大遊行？