耗資逾1,400億元、或只可降落用的機場第三條跑道工程，機管局在爭議聲中堅持上馬，當中有一半造價更由借貸支付，部分款額更向離境旅客「開刀」。本身是天文台前高級科學主任的李偉才亦批評三跑會加劇碳排放，「搞啲咩基建呀、港珠澳大樓、第三條跑道、發展東北就犀利，但嗰啲全部只製造更多排放」，質疑政府訂下的減排目標形同虛設。

「我就覺得唔對路囉」，篤信科學的李偉才，看到逼在眉睫的氣候數據，決定與其他有心人在下月29日、聯合國巴黎氣候峰會前夕發起大遊行，與全球各地的示威者聯手向峰會請願，要求各國領袖把握今次機會，切實減排，「好多時啲人都唔願意去談論一個咁得人驚嘅未來……建制嘅本質就係保守呀嘛……但繼續用呢種傳統極保守嘅心態，係應付唔到呢場災劫」。

筆名李逆熵的他，出版不少科普讀物，分析氣候危機。他留意到有些迷信自由經濟的人，很主張由市場解決氣候危機，但歷史已證明無效，「歐盟10年前開始碳交易體系，但10年打後，而家睇到成效好微，涵蓋全世界個範圍更加睇唔到」；諷刺的是，認為市場力量終可化解危機的人，卻為數不少。

「行為、科技、政策、市場，其實真係要帶頭嘅係政策，你話沖涼短一分鐘、慳番幾多水呀，盡量唔好揸車、搭公共交通呀，呢啲係好，但係解決唔到個問題」，要改變政策，李偉才更傾向以雞蛋破高牆，「如果啲政府、領導人冇一個強大的民意基礎，佢又點去推行呢啲不受歡迎的政策呢？……所以我們就要由下而上（影響當權者），咁先可以（有政策）由上而下……始終要有一個全民覺醒」。

一場雨傘運動，不少港青政治覺醒，那麼「氣候覺醒」呢？原來自去年起，英美多家著名學府均有學生要求校方撤走石油石化等企業的投資，其中美國史丹福及英國格拉斯哥大學更正視學生訴求，成功撤資。至於美國哈佛、英國牛津大學今年起更有學生發動「佔領校園」，要求校方承諾撤資，「因為呢啲大學好有錢㗎嘛，所以由佢哋撤資，就發出個好強信號，就係化石燃料係遺害社會，係無前途嘅」。李偉才則去信港大和中大，但港大未有回應，而中大雖有跟進，但仍未正面回應會否撤資。

除大學外，李偉才說，不少人更寄望梵蒂岡撤資，「教宗方濟非常前衞，好多嘢好大膽直言，佢對氣候變化都講咗好多」，一旦撤資，「呢個唔止係市場信號，係一個宗教道德嘅召喚，咁（個影響力）就好強」。