當年今日
關於我們

【天煞孤星】同蔣家旻拍拖影合照? 坤哥:邊個埋嚟我身邊都有緋聞

蘋果日報 2017/12/16 18:18

吳業坤余香凝徐加晴

吳業坤、余香凝、徐加晴等今日到將軍澳出席港台舉行嘅音樂比賽,其中擔任評判嘅坤哥表示:「自己當年都係歌唱比賽出身,今次調返轉做評判,希望盡量做到公平公正。」佢話盡量唔好同參賽者有眼神接觸,等佢哋可以專心演出。講到嚟緊頒獎禮,坤哥話會盡量出席:「但會抱住一般心態,因為今年花咗十個月時間拍劇,淨係得兩首新歌,所以都係志在參與。」
有報道話坤哥同蔣家旻傳緋聞,佢話:「其實我哋只係一齊影咗張相,就有咁嘅報道,睇嚟我都係天煞孤星好危險,邊個埋嚟我身邊都有緋聞。」
余香凝今日就剪咗一頭短髮現身,佢話:「因為電影劇情需要,導演需要一個比較成熟角色所以就剪短。」佢話咁多年嚟都未試過短頭髮:「中學時曾試過剪短,但一剪短就嚇親所有男生,今次剪完男朋友嚟接我都唔認得我。」余香凝又透露自己頭皮內生咗個小肉粒,佢話:「聽人講變如果變黑色就有危險,暫時仲係粉色,一路未睇醫生,要睇就要剃頭,咁不如等我生仔開刀嘅時候先一次過,開上面又開下面。」
至於新人徐加晴就透露,啱啱喺上海拍節目返港:「因為上海天氣凍又著唔夠衫,所以即刻病咗,尋晚仲要漏夜睇通宵醫生打針食藥,都有啲擔心一陣要表演而且聽日仲要出席頒獎禮。」
更多娛聞,喺晒《娛果》
http://fb.com/appledailyent
empty
坤哥話自己係天煞孤星好危險
empty
empty