新一屆區議員1月1日正式上任，區會將會由泛民主派及非建制派議員控制，雖說區會並無實權，但作為地區橋頭堡，對北京而言始終「唔安樂」。季陶聽聞北京已為新一屆區議會「收風」，主要是針對一班素人，因為即使是港府或中聯辦，對這班新丁絕大部份是零認識，「佢哋完全唔知呢班人會搞乜出嚟，所以先唔安樂」。

有民主派中人對季陶表示，近日有北京人士來港為新一屆區會收風，特別想知一班新丁議員「究竟想搞啲乜？」該民主派中人笑言，以往區選之後，民主派新丁議員不多，「即使有，大部份都有政黨背景，北京大約預計到佢哋點玩，但今次一下子有百幾二百個素人區議員，完全冇背景冇紀錄可以跟，仲要有17個區會由泛民同非建制派議員控制，北京真係關心呢班新丁唔知會玩到幾大」。

統戰手段無效

事實上對北京而言，區議會一直是好使好用的政治工具，現在被民主派控制，「（民主派控制的區議會）未必做到乜驚天動地嘅事，但要喺地區搞住西環嘅地區工作、組織民意反對政府就一定做到，呢個令西環好頭痛」，而且這些新丁大多是因為反送中而當選，「北京嗰套收買、統戰手段對佢哋冇效」。該民主派人士認為，北京最怕這些新丁用四年時間改變市民對區議會的看法，「如果市民真係接受區會當立會咁選，呢班素人隨時落地生根，建制派就等同永遠冇辦法搶返過半區會議席」。

季陶
周一、三、五刊出