昨日多家重磅股公佈業績,中移動(941)業績表現搶鏡,帶動恒指上升。嘉賓指出,大市未來升勢能否持續,要留意買盤是否全面,他認為,恒指短期上升阻力在21700點。
何:荷蘭銀行私人投資產品部董事何啓聰
黃:亨達集團研究部董事黃敏碩
主持孫柏文
孫:中移動業績後,股市表現興奮,恒指升幅強勁,點解?
黃:有機會因為好友趁期指結算前挾高個市,另外近期公佈業績股份表現不俗,所以大市都有得升,不過九月升勢可唔可以持續,要睇成交量可唔可以配合,而中央救市都係動口不動手,對內地股市毫無刺激。
何:升勢可否持續,要留意買盤夠唔夠全面,睇到內銀股公佈咗業績,亦符合預期,但係都升唔到,由此可知資金未有全面買入中資股份,恒指上升阻力短暫會係21700點左右。