今年台慶頒獎典禮，黎耀祥與《公主嫁到》的陳豪被視為視帝頂頭大熱，連早前舉行的《萬千星輝賀台慶》，也拿祥仔與陳豪視帝之爭作話題項目表演。不過祥仔認為今年是三分天下，除他與陳豪外，林峯絕對有機會跑出。
祥仔說：「今年一定好好玩，因為係三分天下。先講林峯，大家都睇到個勢喺度，佢係近年一個好成功嘅偶像派例子，佢啲fans好犀利。要知道，做偶像唔容易，自從梁朝偉、劉德華、湯鎮業、黃日華同苗僑偉嘅五虎之後，TVB嘅年輕偶像真係唔多，劉德華之後幾乎完全冇，變成一個真空期。偶像派係一個夢，如果冇偶像派，呢個圈唔會有生氣。作為圈中人，都希望呢個圈有生氣。唔通你撈晒咩，要令個圈有生氣不斷運作，我哋先至會有得撈，娛樂圈先至有希望，所以我從來唔反對偶像派攞獎！」

說到陳豪，祥仔大讚他在《公主嫁到》的角色相當突出，喜劇感相當重，演起來並非一般喜劇般簡單。祥仔說：「雖然有人話喜劇攞獎唔着數，但陳豪自創佢一套嘅喜劇演繹方式，睇得出佢背後花咗好多心機去設計個角色出嚟，佢分分鐘有機會做周星馳接班人。」
大讚兩位對手之餘，祥仔當然對自己也有一定信心，他笑說：「我覺得自己着數在個角色，劉醒個角色係比較戲劇性，從技術上去睇，一定係劉醒着數，但都要睇今年大氣候，究竟係吹捧實力派、偶像派，抑或係娛樂性重啲？對我嚟講，有口碑有收視已經算贏o架啦！」