皇馬贏港隊，雖然係意料中事，但港隊入番兩粒，可算係意外收穫；上次英超聯勁旅利物浦已經吸引唔少高官名人入場，今次皇馬嘅號召力更大，富豪盡出，包括劉鑾雄兩兄弟、鄭裕彤、郭炳江郭炳聯兄弟、李國寶、田北辰，加埋身家可以話係天文數字；高官代表有政務司司長曾蔭權，而上次親自排隊撲飛嘅張文光亦有幸入場捧碧咸。

公益金宴甚西化
前一晚皇馬球員喺香港四圍蒲，見識過香港夜生活同風情，但就似乎冇乜機會品嘗香江美食，珍寶海鮮舫曾邀請皇馬球員去海鮮舫食海鮮，重特別設計咗張精選菜單，不過珍寶董事局顧問柯威全話由於皇馬嚴格控制隊員飲食，所以最終都無緣去香港仔食海鮮。
八方睇過張菜單，包括帶子、鮑翅、龍蝦同鮑魚，屬於中西合璧嘅Fusion菜，不過柯威全話張菜單專為皇馬而設，即係一般球迷冇機會品嘗到呢餐「皇馬宴」，佢亦唔肯透露食一餐要幾多錢，八方攞住呢張海鮮餐菜單同公益金前晚慈善夜菜單比較，覺得都唔係幾啱香港人口味，相信都係為鬼佬而設多啲。