成日俾人話佢「女生男相」嘅台灣歌手潘美辰，日前喺西藏舉行音樂會之前，喺路上發生意外，話說當時佢同工作人員一行五人走去行街，突然俾一架開得好快嘅車撞到，工作人員上前同對方理論，潘美辰諗住出面做「和事老」，點知對方以為佢想索償，所以其中一個男人即刻發難，向潘美辰施襲，扣住佢雙手兼勒住佢條頸，最後搞到要報公安。

戴黑超難分性別

呢單嘢馮仁昭之前都有講過，事發後潘美辰被送院檢查傷勢，醫生話佢除咗手肘同膝蓋受傷之外，仲搞到喉嚨扁桃腺發炎。最傷嘅係俾對方撞歪鼻骨，流足兩日鼻血。
前日潘美辰喺台灣出席新碟《最冷的夏天》發布會，展示傷勢，見佢條頸仲有明顯被抓嘅傷痕。身為女兒家嘅佢俾車撞之餘仲俾對方以暴力對待，馮仁昭都戥佢唔抵，不過潘美辰不怒反笑，仲自嘲話發生呢件事同佢嘅中性打扮有關，佢話：「我想當天我戴着一副墨鏡，打扮又中性，他一定不知道我是女人。」
今年潘美辰可以話好黑仔，首先係綵排音樂劇《北京女孩》期間搞到脊椎舊患復發，今年5月去山東演出時，因為中間人突然失蹤，潘美辰見唔對路想走，點知同經理人一齊被強押，𠵱家又發生呢單嘢，難怪曾經發過誓唔會着裙嘅潘美辰好幽默咁話：「一定是我接演《北京女孩》扮女生，穿裙子遭天譴！」