中港指數表現肉酸，但二三線股相當精采，好多更升到你唔信，翠華（1314）及CEC國際（759）不在話下，本欄近日推介的理文手袋（1488）及通達（698）亦破頂再破頂，其實情況不難理解，大部份散戶見升得咁急，好自然唔敢追，貨源盡入強者手，唔炒爆就奇！
資金再有追炒復蘇迹象，興達國際（1899）屬低調的中線穩膽之選。公司主攻子午線輪胎，重型及客車各佔業務67%及33%。
子午線亦即鋼線，性能比以往的斜交胎優越，既耐磨行車亦較穩定，有助減低交通意外。興達目前於內地市佔率近33%，入行門檻極高，定價能力有保障。

過去兩年，興達經歷行業低潮，主要由於基建放緩，導致重卡車的輪胎替換需求下滑。去年中期賺1.5億人仔，按年倒退41%，比海嘯時期更差，但應屬黎明前的黑暗期。中國重汽（3808）昨公佈令人振奮的數據，1月重型卡車銷量達4,614輛，按年大升74%，興達勢必受惠。以下半年盈利比上半年反彈50%計，全年純利料達3.75億人仔，預測PE 12.6倍，今年預測PE勢降至單位數，現價買相當值博。
興達走勢呈杯柄形態，短線將上試4.20元阻力；如成功突破，量度升幅可見6.30元，潛在水位64%。

魏力
http://www.facebook.com/2012jason