李克勤喺《李克勤慶祝成立30週年演唱會》頭場中，邀請咗鄭秀文（Sammi）擔任嘉賓，佢哋合唱完後，克勤送咗紮花俾Sammi，然後Sammi笑着到全身紅色嘅克勤似利是封，佢仲話克勤好鬼麻煩，搵嘉賓仲指定對方着咩色上台，Sammi話：「開頭呢我就諗住着黃色，成條蕉咁樣升上嚟架嘛，今晚搞到成支波子汽水就出嚟。」克勤回應：「fashion嘅嘢我邊識吖？都係Wyman同太太決定，每晚都有唔同嘅顏色，9晚有9種唔同顏色就好靚喇！但係兩個利是封企喺度，又太搞笑。」

大會播出佢哋以前拍《浪族闊少爺》啲劇照，有對望同咀相，Sammi問克勤都入行30年，咁呢套劇係幾耐之前拍年？克勤話：「應該都差唔多。」Sammi即爆：「嘩，同得你做friend嘅，好容易出賣年齡。」佢再追問克勤今年其實幾多歲？克勤話：「五張仲爭少少，其實男人到五張嘢先有啲男人味，你先識欣賞。其實都差唔多，我同你嗰個一樣，都係熱愛足球差唔多年紀。」Sammi就話自己呢排同盧淑儀喺社交平台聯絡較多，克勤話：「之前你開騷，每次太太都嚟唔到，因為佢都大緊肚，所以嚟緊下次你開演唱會同我講聲……」點知Sammi話：「嘩！你五張嘢喇喎，仲可以咁厲害咩？」克勤就得得戚戚咁答佢：「你畀啲時間我準備。」

克勤話今次邀Sammi，所以唱對方嗰首《信者得愛》，克勤仲負責rap嗰part，Sammi憶起之前開騷失聲，克勤有send message俾佢問要唔要幫忙，要就開聲，Sammi話：「喺娛樂圈得到珍貴嘅嘢，係大家互相支持幫助。」佢哋仲話因為今日克勤晏晝冇綵排直接開，搞到佢都有擔心，Sammi私下都有send message，今晚入場全部都支持佢嘅人，只要盡力大家會睇到，兩人擁抱後，克勤落台換衫，Sammi solo演唱前話：「首歌係克勤要求，雖然之前開騷演唱過好多次，係《終身美麗》，企番喺舞台上，諗番起之前失聲，我好想再開騷，希望到時大家會嚟支持。」