當年今日

報告王:
小心反日累東風反車 - 瑪姬兒

蘋果日報 2013/05/07 00:00


港股升勢凌厲,恒指昨日試衝二萬三關,相信不少散戶都心郁郁,想趁市旺搵番幾隻股份賺轉快錢。不過,記住識得入貨,都要識得止賺。如東風集團(489),4月底公佈首季盈利按年倒退47%至14.3億元人民幣,按季亦下跌27%。不過,在沒有實質利好因素刺激下,東風股價由3月中約10元低位,一直跟隨大市反彈至昨日最高位12.26元,累積升幅超過兩成。
高盛指出,東風首季盈利,只佔上半年盈利預測約三成,成績點解咁差?原來是「反日情緒」累事,導致期內Nissan及Honda銷售分別下跌22%及11.5%。較賺錢的Nissan Teana(日產天籟)型號只賣出7,300輛,按年急瀉79%,加上公司去年第四季入賬一筆9億元人民幣的特許權使用回撥及滙兌收益,所以亦出現盈利按季大倒退。
有貨不妨止賺離場
雖然高盛大派定心丸,指3月內地日系汽車銷售已逐漸復蘇,市佔率重上18%,勢頭料可延續。另外,東風年內於不同月份將推新產品,有助加快復蘇步伐,故繼續叫「買貨」,目標價就由13元輕微降至12.92元,距離現價12.14元仲有少少水位。
不過,睇番技術分析,RSI及STC都開始進入超買區,反日情緒仍然是計時炸彈,東風未必有力升破13元阻力位。有貨的散戶,不妨考慮止賺離場。
瑪姬兒