「美國隊長」基斯伊雲斯（Chris Evans）去年初被爆搭上失婚女星Jenny Slate，不過戀情曝光不久，有關女方嘅黑材料越揭越多，形象正氣嘅基斯最後都主動提出分手，令短暫戀情火速玩完。

基斯同Jenny Slate合作嘅新片《天賦的禮物》（Gifted）上映在即，今日佢哋被迫再度合體，一同出席喺洛杉磯舉行嘅首映禮。基斯同舊愛Jenny於活動上碰頭都表現大方，雖然係二人分手後首次公開同場，不過就一啲都冇尷尬，基斯仲用手輕攬Jenny笑晒合照。

其實基斯戲內戲外都係個暖男，佢喺《天賦的禮物》中跟天才童星麥根娜姬絲（Mckenna Grace）合作，演繹出窩心動人嘅溫情故事，基斯喺片中飾演自命平凡庸才嘅法蘭，當胞姊離世後，獨自竭盡所能撫養七歲外甥女瑪莉。可是，瑪莉不經意展露出對數學天賦後，平靜生活逐漸被破壞，而外婆為銳意栽培瑪莉，不惜對簿公堂誓要將二人分開，而法蘭為要守護外甥女及對亡姊之承諾，佢決定力抗到底，同片仲有金像女星奧緹華史賓莎（Octavia Spencer）參與演出。