教育局2014/15學年起投放兩億，向公營及直資中學提供每年約50萬元生涯規劃津貼，讓學校加強生涯規劃教育和升學就業輔導服務。廠商會中學校長麥耀光接受訪問稱，此項津貼用於學生生涯規劃教育，「學校可以用嚟請教學助理或教師，又可以用嚟買服務、搞活動，只要係用喺學生嘅生涯規劃就可以」。
麥指該津貼以學位教師薪級表的中點薪金釐定，「因此唔少團體問點解（教育局）唔將條數納入長工（薪酬），畀多個教席？教育局最終畀學校將筆錢轉為常額教席，但又有啲學校話購買服務合約未完，所以惟有推出彈性選擇，校方可以揀用筆錢嚟買服務，或者用嚟請人」。
麥指站在教師角度，「多一個常額教席當然更有保障」，惟在學校營運角度或有其他考量，故導致校內教師、校長意見分歧。
至於何謂生涯規劃，麥指「狹義嚟講係升學、搵工、就業方面嘅教育，可能做吓啲性向測試、教吓點面試」，但亦包含人生規劃、發掘學生興趣、培養正確價值觀等德育內容。麥稱不少學校也一直進行相關教育，「咁多啲津貼就多啲資源針對性咁搞活動，對學校嚟講都係好事」。
教育局回覆稱，皇仁書院做法合乎指引，又指局方自2014/15學年開始已探訪377所學校（約佔全港中學74%），就生涯規劃教育提供改善建議和意見。
■記者葉偉東