華拉尼被罰紅牌 視像裁判唔用好過用?
法國英格蘭華拉尼國際友賽迪利阿里
華拉尼(4)被指在禁區內踢跌迪利阿里而令法國輸12碼
法國星期二主場以3:2擊敗英格蘭嘅國際友賽,視像裁判喺比賽中發揮作用,球證馬沙(Davide Massa)喺視像裁判(VAR)嘅協助之下,決定以紅牌驅逐法國球星華拉尼出場,不過呢個經翻睇錄影片段而做嘅判決就惹嚟爭議。
話說當時係下半場初段英格蘭落後緊法國1:2,三獅軍團嘅迪利阿里喺禁區內畀效力皇家馬德里嘅華拉尼從後踢跌,意大利籍球證馬沙直指12碼點,而喺比賽停咗一陣之後,經過視像裁判確認,馬沙就向華拉尼出示紅牌,結果英格蘭由哈利卡尼主射12碼中鵠追和。
由於華拉尼當時同迪利阿里嘅接觸都係好輕微,所以呢個判決就惹起咗爭議,好似《ITV Sport》評述胡禮就認為技術上嚟講華拉尼係有犯規,但呢個判決係太嚴。不過,阿仙奴名宿迪遜就認為球證做得啱,佢話︰「球證冇得揀,佢要睇吓有冇接觸,華拉尼唔係專登踢跌佢,但呢個係犯規,係毫無疑問嘅。」至於網民反應普遍就認為呢個係一個錯誤嘅判決,多數認為罰12碼同畀黃牌華拉尼已經足夠,甚至有人話VAR破壞比賽㖭!
《ITV Football》就華拉尼因為視像裁判而被逐出場問網友點睇