當年今日
關於我們

【爆相爆片】Band友右手打畀老婆 左手偷結他掣

蘋果日報 2018/06/04 07:30

爆相爆片樂器舖結他掣

深水埗一間樂器舖最近發生咗單店舖盜竊,賊仔嘅手法不做作,但可惜掛住望地,唔為意有天眼影哂過程。天眼片段影到呢位人兄就係主角,佢上個月27日傍晚約6點半,入到深水埗福華街一間樂器舖。只見佢眼明手快,睇見四周無人立即彎腰對準目標結他,扭呀扭咗一粒拾音器切換掣出嚟,拎着粒掣行兩步,見冇人見到順手放入褲袋,全程都唔夠半分鐘。
故事仲未講完,人兄果然冷靜,犯案後唔係即刻走,而係不變應萬變,繼續留喺舖入面,仲拎部手機打電話。講啲咩?原來係講頭先喺琴行買二手貨時同人講價!睇嚟呀人兄數口幾精,講緊電話都不忘再偷多一粒,最後先走人。
舖頭負責人程先生話,被偷走嘅係電結他拾音器切換掣,事隔幾日後有客人問起冇咗時,先揭發事件。程先生解釋,事發時佢喺貨倉做緊嘢,店面嘅職員亦留意唔到所有角落,結果被人有機可乘。
被偷嘅零件據程先生指只值幾十蚊,但市面上好少地方賣,訂貨嘅數量太少亦無人接單,如果搵唔到零件,兩支總值近5千蚊嘅電結他就要平賣,甚至賣唔出。由於涉及金額唔大,程先生話無打算報警,但呼籲偷零件果位仁兄可以歸還,唔打算追究。不過經一事,長一智,程先生決定喺舖頭嘅死角位都加上閉路電視監察。
你敢爆,我敢獎! 即Call《蘋果》24小時爆相爆片熱線63836568
empty
【影住都唔知】Band友右手打畀老婆 左手偷結他掣
empty
被盜的同款零件。(負責人程先生提供)