韓國天團BIGBANG喺各地都擁有唔少粉絲，繼去年2月T.O.P入伍，上月27號隊長G-DRAGON當兵後，今日就輪到新婚人夫太陽入伍，而聽日就到大成服役，預計勝利亦會於今年入伍，令到BIGBANG最快都要明年年底至2020年初先有得合體。

而今日太陽會喺江原道鐵原郡第6師團青星新兵教育隊現役入伍，來自中日韓台等地嘅粉絲都一早抵達訓練所外，希望可以送太陽入伍。而有來自台灣及日本嘅粉絲更組團包車出發送太陽入伍，根據粉絲喺Instagram分享嘅片段所見，粉絲包咗大旅遊巴車，由首爾出發到訓練所，粉絲指單係車程都要兩個鐘，幸好今日天氣尚算唔錯，唔算十分凍。

當中粉絲喺包車上就播放太陽歌曲，而去到訓練所門外亦可見有架大車，大車上有一個大電視，現場亦都播住太陽嘅歌曲，訓練所場外聚集咗近百粉絲，佢哋都好有秩序喺場外等太陽現身，唔知一向出名愛錫粉絲嘅太陽會唔會同粉絲道別呢？

更多韓流，喺晒《娛果》
http://fb.com/appledailyent