羅敏莊同陳國邦個寶貝女陳禛，前日4歲生日，佢哋兩公婆喺屋企幫陳禛搞咗個生日派對，陳禛嘅契爺契媽、即係阮兆祥同女友Crytal都有出席。為咗o氹個女開心，羅敏莊兩公婆仲買咗個大型吹氣滑梯畀囡囡同班小朋友玩。一向精靈鬼馬嘅陳禛，仲喺party度攞住支咪發言話：「我今日4歲啦，真係好多謝大家，我都好鍾意你哋㗎。」

《蘋果》今日打畀羅敏莊，佢話個吹氣滑梯係喺淘寶訂番嚟：「個滑梯喺香港租要2000蚊，但喺淘寶訂3000幾，所以喺淘寶訂，玩兩次都值番囉。湯盈盈都話同我租，淨係收呢啲租金都值番啦。」