陳嘉寶（Anjaylia）、蔡穎恩（Evelyn）同SuperGirls今日去到荃灣參與一個中秋節慶祝活節，好開心有份演出嘅電影《沒女神探》上映八日經已收得超過四百萬票房，而啱啱同家人去完日本嘅Anjaylia，話今次係由男友擔當導遊帶隊，佢話:「我自己係路痴，日本只係去過兩次，又唔識日文，所以都係靠佢。」

今次亦都係Anjaylia男友首次參與家庭遊，而家人都好滿意Anjaylia男友，Evelyn話：「我哋識咗八年，佢（Anjaylia）有時有少少唔知自己點，有時話個男友唔好，佢都會話無乜嘢，而今次係我過目過男人中最好。」Anjaylia都指Evelyn曾幫佢嚇走兩個追求者，而Anjaylia都好開心見到Evelyn現時都非常幸福。

SuperGirls成員陳嘉熙（Cheronna）以紗布遮掩右眼出席，原來係佢對眼因長期戴矯視隱形眼鏡令眼角膜發炎，現時要畀對眼休息兩星期，佢話:「其實兩隻眼都有事，右眼就嚴重啲，醫生話要兩個星期先康復，之後就要再配眼鏡載，o依家睇嘢都唔清楚。」未來兩個禮拜佢出入都要靠身邊姊妹就要負責做佢盲公竹。