袋巾同煲呔口水戰意外地精采，台上袋巾揮灑自如狂砌煲呔，台下風光都有睇頭。長毛噚日喺場外示威後，雞咁腳入場就坐，霸定頭位準備喺辯論期間發難，八方見佢行行企企一輪，最終揀咗坐喺中間前排有利位置。
長毛坐低後冇乜動靜，反而附近啲人就竊竊私語。小超人李澤鉅原來坐喺長毛後面，長毛一坐低，小超人就周身唔聚財咁，郁身郁勢好唔自然，冇耐仲起身調位坐咗去另一邊。長毛係搞事人物，不過佢目標明確，噚晚擺明針對煲呔，冇話同李家過唔去，缸瓦唔一定會撼瓷器嘅。
場內另一角落都有好戲，賭王何鴻燊坐喺民主黨人附近，雙方禮節性握吓手打招呼，唔知有心定無意，賭王同好多民主黨人握手，就係冇同黨主席何俊仁接觸，兩人都當對方透明。