陳柏宇（Jason）同胡鴻鈞今日去灣仔會展購物展做表演嘉賓，Jason話呢幾日都有聖誕party，不過暫未準備禮物畀太太符曉薇，佢話：「平時成日都送，下年年頭會陪老婆去旅行就係我送畀佢嘅禮物，老婆請我去旅行亦係一份禮物，今次會同一大班朋友去。」講到冇得二人世界，Jason話不介意：「成日二人世界好悶，日日都對住大家，我哋之前度蜜月都好想一班人去，呢個係後現代浪漫手法。」

至於胡鴻鈞就話今日日頭開工，夜晚就去睇at17演唱會，聽日聖誕佳節就約咗緋聞朋友許廷鏗同巨聲幫一班朋友開party，每人準備一份200元以下禮物交換，物輕情義重。胡鴻鈞今年拍劇得到多項提名，佢話每次都係去party咁嘅心態：「今年自己都好忙，明年希望抽時間去旅行玩下。」記者提議叫佢同許廷鏗去？佢話：「唔好講到我得佢一個朋友啦，我有其他朋友㗎，我哋之前都去過幾次，成班朋友去，兩個人去真係搞唔掂，對得太多好悶。」

更多娛聞，喺晒《娛果》
http://fb.com/appledailyent