當年今日
關於我們

【名家搶先睇】加息、政變、貿戰、俄鋁(孫柏文)

蘋果日報 2018/09/10 18:40

美國中期選舉

今週開市,恆指繼續跌。睇華文傳媒,就話因特朗普要再搞大對大陸嘅關稅。講真,真正理由係上週美帝出咗就業數據,人工升幅好大,令連有金剛護身嘅花旗國股市都要插鑊甘。
因之前啲人仲估今次加息浪只會去到2019年(甚至今年年尾已加完)。不過出完數據,就開始諗息口會否真係不斷加到2020,甚至重返5厘?6厘?真係唔敢諗到時港樓價會點。
至於貿戰,華文傳媒仲喺到想估特朗普想點。其實,特朗普喺未來兩個月,都會超被動。不過唔係因我國利害了的中央迫,而係被佢哋11月初本土中期選舉牽制。
花旗民主黨初選,啲老人家一個又一個被少壯超左膠派射下馬。留得低嘅,就要左膠上身。左膠一貫係自己鍾意嘅嘢要免費(用「呢個係基本人權」做包裝),唔鍾意嘅嘢就要政府禁。佢哋唔鍾意特朗普,所以就算民選都好,要禁。即係政變。民主黨贏,就會隊佢落台。
其實呢場政變,成功與否,先係左右貿戰關鍵。特朗普輸,就冇得收番。佢贏,就可以再講數。所以中央已擺出態度,等中期選舉之後再算。
至於俄鋁(486),佢哋賣嘅鋁種類,溢價越升越有。因啲人真係驚10月尾制裁會落實,之後全街都冇。即俄鋁已綑綁咗啲客做人質。10月尾,即中期選舉前。如要我估,唔會有定案住。我諗又會延期。不過大家買咗嘅,要有心理準備冇延期,要將股票提倉,兼停牌。
我們已成沙粒,飛沙風中轉。
孫柏文
全球樓行 Dream House零距離
https://hk.feature.appledaily.com/overseasproperty