好多時候，話不用多，擲地有聲，一句就夠。好似國泰航空近月發問卷諮詢駐港空少空姐，工會要求只設一條問題，就係贊唔贊成延長退休年齡至60歲，簡潔利落。見問題如見人，新任國泰空中服務員工會主席胡綺薇（Vera）同樣快人快語，自言性格男仔頭，「我唔鍾意婆婆媽媽」。
無獨有偶，Vera同工會前主席黎玉嬋（Dora）都係一頭短髮，但原來Vera以前一直長髮及腰，因返工要紮起髮髻，「經常壓住個頭好重，成日頭痛」，先剪去大半頭痛絲。而做空姐前，Vera其實係一名髮型師。

難忘沙士全機人戴口罩

中五畢業後Vera修讀職訓局髮型設計，第一份工喺中環蘭桂坊當髮型師，幫過唔少闊太剪髮，但做咗一年就冇做，唔係技術唔掂，係把口唔得，「對住啲阿太，髮型師就係另類心理治療師，佢哋乜都同你講，但我就好內向，把口係撬極都唔開」。
後來Vera再讀酒店管理，仲考第一，先後任職文華東方同世紀酒店，見得人多，把口自然開。1995年佢投考國泰空服員，畢業時仲由當時嘅機艙服務經理、後升至行政總裁嘅湯彥麟（Tony Tyler）頒發證書。
入行22年，Vera最感慨見證國泰由昔日強勢到今天迷失方向，最難忘係2003年沙士襲港，長途機得10幾個客，全機人戴口罩，因怕除罩連派餐都唔食。