曾特首呢個平安夜真係唔平安，因為佢要喺維多利亞宮埋頭苦幹，做好個述職報告，查找不足。當佢咬住支筆嘅時候，可能會諗起佢前上司董建華，原來份工真係唔好做，到最緊急關頭，就變番做一個孤獨的推銷員，冇人行出嚟幫你，呢個時候，佢更覺得曾太重要，只有佢永遠同自己站喺同一陣線。
好彩阿爺胡錦濤已經話過，政改唔過都唔會怪晒煲呔，所以未至死罪，但係始終好冇面，上場第一仗就輸咗，EQ幾高如煲呔都難免會有啲氣餒，要少少時間調整心情。
究竟應唔應該聽陳主教同陳太講，喺報告內提出港人要時間表，要二○一二全面普選呢？呢個都要小心處理，因為表達得唔好，可能阿爺唔高興，但係唔寫又未必得，因為阿爺在港線眼眾多，唔可以瞞天過海，反正講又難，唔講又難，煲呔睇嚟只有如實報告。

冇時間表誰之過？

八方聽過一個小故事，就係有一個時候，阿爺都開始同特區傾普選時間表，點知忽然殺出社福界長毛雄，提出要全民公投，於是嚇到阿爺馬上叫停，唔傾落去。究竟是誰之過？一切都已變成歷史，煲呔如果要多做一屆，普選時間表避無可避，正如行會成員張炳良講，一定要坐低好好協商出一個辦法來。
煲呔二十七及二十八日上京，之後就即時放假，聽講佢同太太會去福建遊玩，散散心，二○○六年先返港，一月三號開行會，傳達阿爺最高指示。肥龍橫掂都要為煲呔分擔痛苦，就做埋新年署理特首，幫老友睇住個檔，直至明年先算。


爆料熱線：29290000、27860099
報料傳真：26239278
報料電郵：[email protected]