內房股近日成為機構投資者及炒家的寵兒，若有留意大行報告的話，當會發現早於個多星期前已有大行在唱好個別內房，例如中渝置地（1224）就連獲兩間大行唱好，股價在幾日內由1.90元升至昨日最高2.50元，升幅超過30%。
內房股還可以追嗎？從蛛絲馬迹來看，升勢應該未完。以方興地產（817）為例，昨日才授出約5800萬股股票期權予董事局及主席等人，無理由咁快就玩完，而行使價2.44元亦已由價外變價內，計及眾多使費，呢批期權會是董事會搵大茶飯途徑之一，未來一兩星期如見公司積極找投行分析員傾偈，又或四出路演，絕對是合理劇情發展。

淡友平倉需時多日

另一方面，內房本身也有重大炒上誘因，皆因目前內地貸款仍然困難，息率且十分高昂，要發債也不容易，炒上集資是合理預期，問題係邊間公司最快手，又或者邊個價位會令那些內房老闆覺得滿意。關鍵事件，是綠城（3900）及融創（1918）等舊股股東配股套現後股價依然硬淨，唔趁氣氛好集資，更待何時？
搵內房來炒最講momentum，恒大地產（3333）早前被Citron唱衰後，一度獲多達8家大行出來力撐，可見公司或老闆與大行關係非常良好，而跌至呢個價位，假如要炒上集資解決融資問題，第一件事係挾死所有空倉，按今年6月的龐大沽空量計算，淡友要平倉起碼要好幾日持續買貨平倉，動力肯定足夠。

歐陽風