由內地網站Letv樂視網製作的首部4K網劇《天才在左 瘋子在右》即將開拍，劇集會以廣東話及在香港取景拍攝，昨日在尖沙嘴舉行宣傳活動，應采兒擔任劇集監製及演員之一，並會聯同老公陳小春夫妻檔演出，而謝天華、鄧麗欣（Stephy）、黃伊汶、連詩雅、柯有倫等也會參與演出。中國星老板向華強昨日更現身撐應采兒，並上台一同進行啟動儀式。應采兒表示親自打電話邀請演員開劇說：「全部自己打電話搵人，佢哋問幾錢，我話錢就冇乜，友情價啦，個個都一致答案，死都死畀你。」她並指老公陳小春零片酬幫忙。

黃伊汶勸樂仔覓真愛

Stephy在劇中跟柯有倫扮情侶，對於近日Cookies舊成員傅穎又爆曾遭眾多隊友排擠，Stephy說：「都莫名其妙，有少少好奇問番隊友，有發生過咩？大家都唔記得，唔想評論太多。」可覺得不和事件談論多年太「八婆」？她說：「所以唔想講太多，事件係點好難分清楚。」可有傅穎聯絡電話？Stephy表示：「如果佢冇改號碼，應該重有嘅。」問到會否找中間人跟傅穎溝通？她就指：「冇乜嘢要講清楚。」
新婚的黃伊汶今次會和老公陳國坤演夫妻，昨日她被謝天華踢爆開設playgroup，黃伊汶說：「係同教育上有經驗嘅人合資，我投資七位數字，教育好大巿場，將來可能自己都需要。」問她何時計劃生B？黃伊汶說：「未有Yumiko（鄭希怡）佢哋咁叻，百發百中，唔知點樣可以咁犀利，遲少少啦，重點係佢（指老公）都唔喺香港。」其舊愛余文樂在訪談節目提及曾向女友求婚被拒，外間揣測為黃伊汶，她說：「過咗去，大家仍然係好朋友，希望佢開心，快啲搵到照顧佢嘅人，佢加油啦。」
採訪：卓寶花
攝影：葉君海