我們每日睜開眼，四周都包圍着跟日本有關的事物，可能剛有個玩NDS、PSP的中年男人跟你擦身而過是「電車男」，或在漫畫茶室遇上看BL漫畫的「腐女」，身邊有朋友由中產跌入「下流社會」……一個個摸不着頭腦的辭彙，除了是日本潮流術語外，也是個社會符號，日本通湯禎兆說，如果香港人都會為社會現象命名，將問題歸類符號化，就發覺天水圍師奶的悲劇，可能更加「心中」有數，成為更深入的研究對象。

記者：張一豪
攝影：林栢鈞
鳴謝：MaidDate（28080789）

湯禎兆日本初體驗　墓前會小津

湯禎兆，最初因喜歡日本電影，加上想學第三種語言，91年報讀日文學校，但當時沒想到會有今日，出書解讀日本文化，踏上日本社會文化研究之路。「因為我好鍾意小津安二郎，所以去到第一件事就係朝聖，到小津嘅墓前參拜，記得嗰時仲唔係好識日文，只係睇過WimWenders嘅電影，有一幕係笠智眾帶佢去參拜小津，我就係透過呢啲片段做線索，認到嗰度係北鐮倉嘅一個火車站，於是膽粗粗就去。93年返香港正式做嘢之後，有經濟能力，去多咗日本又睇多咗日本書，反而對日本認識越來越多。」

香港無法命名「天水圍師奶」

文化研究其實較偏門，但之前的《整形日本》能入選「06中學生好書龍虎榜」，反映有出版市場，「研究社會學嘅契機，是興趣加市場需要，我返港後日劇好紅，令我有市場空間寫日劇研究嘅書。由第一本《拜物圖鑑》開始，一本比一本好賣，加埋台灣市場，到《AV現場》更加因本身題材吸引，爆得好緊要，到𠵱家為止已賣過萬本，更重要是版權亦已賣到大陸。」
日本從「命名」產生出不少流行語，繼而變成一股潮流，再令人爭相討論研究，其實都同市場好有關係，「日本嘅興趣市場分眾好細而且成熟，加上日本人又好鍾意睇書，所以有市場，令好多唔同嘅學者將好多社會現象好快咁捕捉到，然後將佢哋命名，成書發表，再成為一般大眾研究、注意對象，所以就有『人妻』、『落水狗』、『腐女』之類嘅命名出現，呢樣嘢包含文化想象之餘，仲可以帶出社會問題嘅討論焦點，但香港就做唔到，好似『天水圍師奶』嘅稱呼，其實天水圍之外都有呢類家庭問題嘅人存在，香港無替佢作一個好貼切嘅命名，方便社會對呢一個階層嘅人，作更深入討論。」原來命名背後，意義絕不簡單，可以成為一個社會符號，突出問題令人關注。

「秋之勉強大丈夫」不倫不類

日本人並非隨便命名，但香港則流行濫用漢字，「我本書入面，有啲命名即使有漢字，我都會用比較確切嘅中文去繙譯，例如日文中有個命名『負囗犬』，是指將過30歲還未結婚生子嘅女人，我就唔會照寫做『負犬』，負犬喺中文根本都解唔通，所以我將呢個命名繙譯為『落水狗』，因為要兼顧兩岸三地嘅文化，加上我都幾反感𠵱家一啲流行雜誌將日文辭彙搬字過紙，乜嘢『秋之勉強大丈夫』之類，自以為好潮，但其實根本無意思，又唔係一啲高明嘅食字手法，只變成一篇不倫不類嘅中文。」

日本文化大測試　7成人肥佬！

在湯禎兆的新書《命名日本》內，就有不少近10年命名，又或者跟新命名相關的字眼，香港人自命經常接觸日本文化，以下命名日本的辭彙你又識幾多？附圖為聯想貼士。小記就在信和、先達及MaidCafe等一些日本文化愛好者集中地，專找日本精做突擊測試。結果……14條考題得3位答啱半數或以上，噢，下手！

問題

測試

何故　最勁係佢
文化歷：20年以上，因為鍾意日本歷史，越來越有興趣，接觸越廣。
分析：對日本文化認識唔錯，有概念。連「負囗犬」都知係落水狗咁解。

Stanley　專答三級嘢
文化歷：20年以上，喜歡日本動漫文化及汽車。
分析：可能因為對AV有認識，所以第一眼就答「禁室培育」係「叁級嘢」；「下流社會」又話係「黑社會」！

Alan　攝灶家族？
文化歷：中學時代愛上打街霸，做遊戲機店老闆兩年。
分析：唔知係唔係佢有女性朋友係腐女，佢認為腐女係女性親友。吓，你啲親朋戚友都嫁唔出？慘！

Jeff　白卷王
文化歷：好短，由開MaidCafe開始。
分析：識啲基本嘢，其他直情聽都未聽過，14題只答4條，其餘連撞都費事。不過佢半途出家，無可厚非。

Carman　禁室≠AV
文化歷：細個鍾意美少女戰士，之後在日本留過學，又在日本人公司工作。
分析：就算唔全中，都憑字面意思解到。不過「禁室培育」唔係AV喎！

Danny　照抄無分㗎！
文化歷：小學已愛砌模型，後來愛上日本遊戲，主要從這兩方面認識日本文化。
分析：果然有文化，用非法禁錮去形容「禁室培育」。但夢中答番夢中，你發夢呀？

Alan　無創意
文化歷：幾年前愛上ACG，最近搞女傭咖啡店。
分析：「寅次郎」係電影人物？我夠知啦。「禁室培育」又就咁答電影名。唉，無乜誠意兼創意喎。

小南　有做腐女潛質
文化歷：小學開始愛看少女漫畫，現在做Maid兼職。
分析：佢對腐女分析深入獨到：對男與男親密行為感到異常興奮。佢極有做腐女潛質呀！

小雲　Cosplay友破新低
文化歷：自細鍾意漫畫，全職Maid。
分析：佢可能以為「寅次郎」係忠犬「八公」，所以答案係「犬」。睇佢一身Cosplay，竟只啱2題，意外！　　　

答案

1.腐女：沉迷BL及性愛漫畫的女性，可謂女版御宅。
2.負囗犬：落水狗，將過30歲還未結婚生子而又經濟獨立的女人。
3.下流社會：每下愈況中產階級，日本生活水平跌出中產的階層。
4.電車男：近年御宅族的代名詞，正式來講，是秋葉原系的ACG御宅。
5.心中：自殺的一種，包括殉情，天水圍慘案母親逼子女一起尋死，都是心中的一種。
6.濁貧：出自購物狂中村兔，意思是透過消費令自己一無所有，領略貧困之感。
7.禁室培育：非法禁錮，對被害人施暴，不只是電影橋段，日本社會出過不少真實個案。
8.夢中：對一件事非常熱衷就是夢中。
9.雜踏：放鬆心情到一個地方隨意閒逛。
10.苛囗 ：對後輩的欺凌。
11.携帶：手提電話。
12.整形：整容。
13.萌：一種對可愛少女萌生似戀心的感覺，御宅用語。
14.寅次郎：《男人之苦》主角名字，追求純愛和人情味的代名詞，飾演的渥美清已身故，令日本人更懷念。