記得當初入行嘅時候，記者叫做「無冕皇帝」，呢個稱呼都好耐冇聽過囉！中文大學新聞與傳播學院噚日公布嘅調查就顯示，市民對新聞工作者嘅社會地位評價，九七年嘅時候重係第三位，僅僅低過工程師同醫生，但到2001年新聞工作者地位就連跌四級跌到第七位，喺十五個畀市民排名嘅行業中，大學教授成為第一位，跟住就係醫生、工程師，而新聞工作者已畀護士、中學教師、警察都爬過晒頭。記者嘅排名同文員、建築工人、售貨員、的士司機、保險經紀、菲傭就接近咗。
負責調查嘅陳韜文教授認為有咁嘅結果係因為新聞界爆咗幾單好似陳健康事件同賄警嘅醜聞。記者協會主席麥燕庭亦好感慨咁話，新聞同業固然要努力，但各傳媒老闆顧住商業利益之餘，亦唔應該忘記監察社會嘅公器責任。本來職業無分貴賤，但八方都唔想下一代啲人唔知記者係乜，只知有狗仔隊！


E-mail：[email protected]