梁靖琪(Toby)同朱鑑然今日喺旺角出席「莫干山探索極限基地」發佈會，二人將以KOL身份幫浙江省嘅莫干出宣傳，佢哋會親身去到當地試玩唔同嘅障礙賽同極限運動，其中一項會被綁喺飛機上體驗，Toby話：「我哋會挑戰食蟲，因為自己都有健身，有食奶粉，之前有健身教練同我講最快增加蛋白質嘅方法係食蟲，不過唔係周山搵，係有專業人員培育，所以食蟲我都唔驚，反而最怕係老鼠。」

朱仔笑話最怕唔係蟲，而係Toby，問到係咪因為Toby太惡？佢笑話：「係最怕好似Toby咁溫柔斯文嘅女仔。」問到Toby早前喺網上上載收花相，佢就避談係咪拍拖話：「o依家生活開心，順其自然，o依家好享受自己生活。」有傳男友係健身教練？Toby就話：「唔係，我好多健身朋友，人生最緊要係搵個伴侶同你做埋一齊鍾意做嘅事。」朱仔此時即出來仲笑認花束係自己送，仲齊齊話如果有另一半會帶埋到莫干山體驗。

精選娛聞，喺晒《娛果》
http://fb.com/appledailyent