恭喜恭喜，仔仔周渝民同老婆喻虹淵上年11月結婚，三個月前已傳仔仔老婆有喜，噚日仔仔同大肚老婆終於現身，圓圓嘅孕肚畫面曝光！

據台灣《蘋果》報道，仔仔（周渝民）同喻虹淵噚日傍晚約6時，現身一間咖啡廳趕往現場，夫妻二人專登揀隱蔽嘅地牢座位，即使附近客人亦好難察覺。戴著黑色帽嘅仔仔坐喺梳化上，老婆喻虹淵紥著馬尾，乖乖坐喺身邊，只見仔仔一直將手放喺老婆大脾上，不斷撫摸，喻虹淵亦將佢嘅手疊喺仔仔手上，甜密到漏。

30分鐘後，仔仔緊緊拖實喻虹淵走出咖啡廳，現場所見，仔仔老婆嘅巨肚，驟眼睇已有超過6個月，即使着住闊身衛衣，個肚都好明顯，不過手腳仍然纖細。

仔仔全程拖實老婆嘅手，企喺路邊同朋友傾偈，似乎傾緊下一個行程去邊，之後佢哋上車，直駛返屋企停車場。

35歲嘅仔仔同28歲喻虹淵低調愛情長跑多年，舊年11月登記結婚，拍拖直到結婚，已經傳咗喻虹淵N次有喜，不過都係得個講字；直到今年4月，仔仔先放聲氣話就快做老竇，但胎兒性別同預產期就話唔講住。

仔仔經紀人柴曉倩就透露仔仔拍攝嘅國內電視劇《櫃中美人》啱啱拍完，問到喻虹淵肚內係男係女，以及懷孕幾個月，她只係話：「幸福、美滿、感恩、感謝！」