話題都唔少的ASUS ZenFone 6剛在香港上市，除配備6.4吋92%屏佔比全屏幕、Snapdragon 855處理器、5,000mAh大容量電池之外，最搶眼是可翻轉式鏡頭Flip Camera。由標準鏡頭及廣角鏡頭組成的翻轉式鏡頭，既是主鏡頭，亦能翻轉變成自拍鏡頭，主鏡頭的夜景模式、4K拍片功能都能應用到自拍之上，這樣「屈機」設計亦令DxOMark Mobile在自拍一環打出史上最高的98分，但到底ZenFone 6攝力係咪真係咁厲害？

自拍方面，ZenFone 6表現確實理想。自拍相片及影片時都支援標準及廣角拍攝，拍片時經過不同光源環境，測光都以主體優先，人樣都夠光，亦能以廣角及最高4K/60fps攝錄，收音方面都算唔錯，要拍攝Vlog確實幾實用。但要留意是FHD/60fps、4K/30fps及4K/60fps都只支援到連拍5分鐘，拍攝長片的話要調低至FHD/30fps。以ZenFone 6自拍既可開啟人像Mode調校景深外，亦有夜景模式；而它夜景模式是以叠相方式處理，以夜景模式自拍時，須手持數秒待手機處理相片，但實試時未覺有大幅度抖動，而背景發光招牌上的文字都能夠顯示，一般手機自拍係做唔到嘅。

翻轉鏡頭不單止可以拍攝後景及自拍，鏡頭角度更能調校，亦能自動Pan鏡及自動拍攝全景相，但始終翻轉鏡頭是由小型摩打驅動，自動Pan鏡拍片時會有輕微抖動，但比自己手持Pan鏡流暢得多。翻動鏡頭亦帶來動態追蹤玩法，只要點選拍攝對象，若對象走出鏡頭時（當然是鏡頭能轉動的方向），鏡頭都會自動轉動追蹤主體，記者試過在順光及背光環境下都能使用。但要留意，若畫面上有多個主體，有其他物件經過主體與鏡頭之間，以及主體移動速度太高，追蹤都有機會失效。

翻轉鏡頭都並非全無弱點，由於採用外露式設計，鏡頭有機會損壞；但手機能自動感應墜落狀態而自動關上鏡頭，記者都做簡單墜落測試，從20cm處放開手機，都有試過因墜下角度問題，手機鏡頭未有足夠時間合上的情況，大家使用時要小心。

DxOMark Mobile只為ZenFone 6做了自拍測試，得分98分，這成績以自拍水準來說是最高；但要知道ZenFone 6自拍鏡頭亦等同主鏡頭，雖然DxOMark Mobile未有為ZenFone 6主鏡頭打分，但98分對主鏡頭來說實在不算高。記者都有做過測試，ZenFone 6在高反差、較低光的環境下，影像都較鬆散，色彩亦未夠真實，尤其在低光環境下，影像雜訊比Sony Xperia 1多；夜景模式拍攝時，亦未能做到如Mate 20 Pro的光亮效果。相比其他旗艦手機，ZenFone 6主鏡頭拍攝能力略為遜色。

影相之外，ZenFone 6（6GB+128GB）在安兔兔跑分得分為356,780，跟同屬Snapdragon 855處理器的旗艦手機相比未算突出；但在AndroBench測試中，它的隨機讀取／寫入速度就有較好表現，分別錄得152.71MB/s及155.49MB/s。手機喇叭集中在機底位置，橫度睇片時，聲音會集中在其中一方，音色唔夠平衡，但勝在它還保留3.5mm耳機端子，接耳機聽歌睇片都算方便。

總括而言，ZenFone 6的創意確實幾值得讚賞，但世事多多少少都要妥協，要製造出色的自拍鏡頭又要實現高屏佔比機面，主鏡頭拍攝能力難免要被削弱。若然大家平時多自拍及拍Vlog，ZenFone 6又確實幾實用，而且內置5,000mAh大容量電池，外出使用時都唔使帶「尿袋」補給。

售價：$4,998（6GB+128GB）／$5,798（8GB+256GB）

記者：布偉倫
攝影：徐振國、布偉倫
編輯：鄒仲安

-----------------------------
你撐蘋果 我捐$1
支援反送中抗爭者