緋聞男女陳豪和廖碧兒昨日現身銅鑼灣，為服裝品牌UNIQLO旗艦店擔任開幕嘉賓，其間二人應記者要求拖手合照時，陳豪即遞起手踭，廖碧兒見狀主動蹺着他的臂彎，令陳豪滿面通紅。
早前陳豪和廖碧兒一起參與時裝騷演出時，曾親暱地手拖手亮相，但今次則顯得十分避忌，陳豪說：「其實係我主動遞起手先㗎，咁都唔夠親暱？上次行騷拖手，做過嘅嘢我哋唔再做嘛。」再次以情侶檔搵外快，問到酬勞可會特別高時，廖碧兒說：「OK㗎，都係多謝公司安排。」有傳二人是無綫搵錢最多的情侶檔藝人，陳豪說：「都感激公司，如果係真當然開心，我哋一向都唔放金錢第一位，最緊要合作效果理想。」身旁的廖碧兒即齊聲和應，顯得頗有默契。

互撐有獎攞

無綫台慶頒獎禮在即，陳豪和廖碧兒都乘勢為對方打氣，廖碧兒競逐飛躍進步女藝員獎呼聲頗高，她說：「對自己都有信心，但攞獎冇乜運。我都睇好佢喺《溏心風暴》個角色，幾得意。」
陳豪被問到對無綫劇集印象最深刻是那一套時，他答：「《舞動全城》，我都睇好佢，佢好努力大家都有眼見到。」問到陳豪如在台慶頒獎禮上二人分別獲獎，會否向廖碧兒發出愛的宣言，陳豪即面紅紅說：「吓？未諗喎，唔諗呢啲住，順其自然啦。」
採訪：卓寶花
攝影：葉君海