上季開鑼日頭馬中，分別有「四季勁」、「永旺年年」及「怪獸家長」於先前一季最後一仗交出全場最快末段締速，再睇埋前季開鑼日，亦有三匹同類份子勝出，證明呢類馬雖然隔了一個暑假，仍然不能睇小。

況且今年唞暑時間是歷年最短，所以今日(3日)賽事，繼續吼實一批於上季尾衝得勁之馬應冇衰。頭場「星心英雄」、二場「智有心得」、三場「四季旺」、六場「好友益」及第九場一對「中華之光」及「旅遊皇者」此6駒，正是上述所講，於上季最後一仗交出全場最快末段時間之馬。

當中特首盃一班1200米之「四季旺」，除了在四歲馬系列賽蝕分下不敵「佳龍駒」跑二至四名，其餘六戰獲三勝，而且每次贏來走勢有餘未盡，上仗最後一仗133頂磅，仍造最快末段衝贏，跑四五名之「怪獸家長」及「綫路勇駒」再出均入Q，反映水準不俗。

雖然「四季旺」上季三捷贏1400及1600米，不過澳洲馬小休後跑短些少絕無問題，加上廐主沈集成近四次派馬角逐特首盃非冠即亞，今次肯安排「四季旺」縮程於1200米上陣，不似無的放矢。