【識咗幾十年】謝雪心 Joe Junior不捨黎小田 籲要珍惜每分鐘
蘋果日報 2019/12/05 17:24
謝雪心Joe Junior
（攝影：卓寶花、資料圖片）
謝雪心和Joe Junior今日到油麻地救世軍總部和一眾長者聚會，天氣驟降，心姐和Joe都關心老友記體溫，呼籲大家要保暖。
心姐和Joe兩年前合作做螢幕夫妻，至今間中會約埋一齊食咖哩、飲茶、火鍋短聚，但Joe竟表示唔記得，心姐笑他：「女友太多唔記得我。」Joe希望年年聖誕都可以唱歌給老友記聽，代表健康開心，心姐則認為心境開朗最重要，同時鼓勵長者做運動，Joe說：「我每日都焗桑拿，然後浸三、四度冰水，浸咗46年，又會步行，飲暖水。」心姐笑言：「我唔可以浸冰水，但就浸溫泉，早上起身好凍，浸冰水真係唔得。」
Joe稱在樂壇52年，希望出年可以做兩場騷，所以繼續保持健康，因他擔心沒有健康就不能繼續唱，又透露會找心姐做嘉賓，但卻指對方好貴，心姐聽後即否認：「唔好斷我米路呀，我哋唔係講錢。」Joe提議屆時可以唱英文版《鳳閣恩仇未了情》，還即席獻唱英文版本給大家聽，亦再一次叫心姐來做嘉賓不要收太貴。
殿堂音樂人黎小田病逝，Joe說：「一聽到個消息成個人唔舒服，雖然唔係好常見面，我同小田認識50年，夜總會、電台、拍劇、拍戲都有合作碰面。」心姐則說：「我7歲認識小田，做《七小福》時佢係我二哥，冇辦法，最緊要唔好痛苦，安祥好緊要，當然係好唔捨得。」Joe慨嘆：「好怕聽到朋友呢啲消息，會好心噏，珍惜每分每秒。」心姐亦說：「珍惜每一分鐘，時間過去不回頭。」兩人表示對上一次和小田碰面是《流行經典50年》節目記者會，當時並不知道他病況嚴重。
採訪：卓寶花、攝影：沈健程
謝雪心和Joe Junior，今日到油麻地和一眾長者聚會。
心姐表示7歲拍《七小福》時，認識黎小田。