聖誕馬（十二月二十六日）頭兩場開熱門，連贏（Ｑ）派彩分別係六十二個半、三十七個半，到咗第三場，Ｑ派彩高達一萬五千五百六十八蚊，真係差天共地，到咗尾場（第十場），又試熱門天下，Ｑ派八十三個半，三重彩只有九百五十元，相信有唔少人收錢。
惡佬明性好扒冷，收唔到噃。咪以為大熱門贏出，普羅馬迷就會贏錢，其實好多小戶都鍾意刀仔鋸大樹，三隻十零倍嘅馬串Ｑ串T。俾惡佬明中正就最開心。三至八倍嘅Ｑ，只係大戶先至勁中嘅啫。惡佬明好留意數據，佢注意到今季賽馬，每逢日馬尾場，多數係最熱嗰三四隻馬入圍，甚少爆冷。佢嘅解釋就係尾場非孖T場合，賽果比較易估中，所以如果喺尾場吼冷門，就係違反統計，同自己過唔去。

惡佬明有此意見，左丁山亦都睇到老人家亦都所見略同。左丁山自細睇馬經，第一份就係老竇教落嘅《老吉》、《老五》，現在《老吉》冇咗，《老五》仍然由威伯主編，據威伯喺《老五》馬經講，日馬尾場係「派車飯錢」場合，等啲馬迷容易中番一千幾百元，就算前面九場輸晒，佢仍可因最後一注中番單T、三重彩（如聖誕馬尾場，單T加T可收一千零五十九元），足夠搭的士返市區兼有一餐晚飯，回咗氣，下次又嚟博過。威伯之言甚為幽默，大家不妨諗真吓，是否有理。左丁山喺聖誕馬就係根據此原則，集中注碼喺四隻熱門度，「揦番咋沙」，叫做有車飯錢。