就算老竇幾出名，身為囝囝一樣有權唔做「二世祖」嘅，好似皇家馬德里教練施丹嘅大囝安素（Enzo Zidane）就決定離開父蔭自力更生！西甲球會艾拉維斯周四宣佈，同呢位22歲中場簽約3年，雙方未有透露轉會費，安素將會喺下星期正式亮相。

雖然安素歷來為皇馬B隊上陣78場貢獻7入球15助攻，上季喺一隊處子戰對住利安尼沙嘅西班牙盃賽事更即刻取得入球，但要喺「銀河艦隊」星光熠熠嘅中場線冒出頭來談何容易，不如出走西甲中型班爭取上陣機會，對足球發展更有幫助。至於皇馬亦延續近年賣走「潛力股」嘅精明作風，據西班牙《馬卡報》報道，球會喺交易中引入回購條款，如果安素他日成才，就有機會好似丹尼爾卡華積同艾華路莫拉達咁重返皇馬。