05年只得7歲嘅莫凱謙憑一曲《習慣失戀》紅爆大台節目《殘酷一叮》，仲俾主持人李克勤稱呼佢做「莫生」，其後莫生有份演出唔少劇集同綜藝節目。11年後已經18歲嘅莫生，最近簽約經理人決定入行，仲啱啱推出第一首派台歌，兼香港跳繩隊主題曲《跳Jump》。

目前喺中文大學修讀新聞系Year 2嘅莫生話，咁多年嚟都冇放棄音樂夢：「我3歲就開始彈琴，後來就自己上YouTube睇片學結他同寫歌，即使參賽前已經好鍾意音樂，鍾意喺舞台上表演，以前跟住Purple姐姐（李紫昕）去商場表演我係第一個衝上台，爸爸媽媽當時俾好大自由度我去玩。」

既然咁喜歡音樂，於是夠18歲就即刻入行？莫生話：「屋企一直以來幫助我好多，我覺得18歲係人生新一頁，咁啱又遇到o依家呢間公司，簽約前爸爸媽媽有同我分析簽約會有咩好處壞處，得到佢哋支持，而且公司老闆都鼓勵我要繼續讀書，所以嚟緊將會學業唱歌兩邊做。」

今年正式入行，有咩工作大計？莫生話：「今年會繼續寫多啲歌，下一首派台嘅歌《無花果》就正式係我負責曲詞編監嘅作品。」除此之外，佢又希望：「同以前見過面嘅哥哥姐姐再合作，包括《殘酷一叮》嘅主持克勤哥哥同Joey姐姐，當年試過一次被邀請去Joey Fan Club活動有機會同佢同台合唱，希望有多次音樂交流嘅機會。」

講到有冇視邊位歌手為目標，莫生話：「最喜歡一定係Eason，由細到大都聽佢嘅歌，另一個好有感受，想以佢為目標嘅係陳柏宇，佢今年入行10周年，好欣賞佢嘅堅毅，如果有得合作就最好。」