現年26歲嘅無綫《3日2夜》「咪神」歐陽巧瑩（Tammy）今日升呢做人妻，嫁畀30歲嘅「木偶哥」林師傑，一對新人夜晚會喺尖沙嘴某酒店筵開30幾圍囍宴。而兩人嘅結婚相亦正式曝光，Tammy換咗幾套婚紗造型，大騷完美身形，仲好煙韌八爪魚上身，夾實未來老公影相。Tammy噚日接受傳媒訪問時就冧爆透露知道未婚夫作歌畀佢，仲話對方要通頂綵排，相當心痛。問到情歌叫乜嘢名，佢笑住話：「我乜都唔知㗎，保持神秘感。未得閒緊張住，不過係有少少興奮，因為籌備咗咁耐，終於到聽日了！」

寫歌告白

Tammy相當回味呢輯婚紗相，佢甜絲絲話：「最難忘嘅係睇相嗰吓，見到佢個樣好開心，佢仲download咗落嚟做wallpaper，覺得佢好迷戀我，我好高興。」

木偶哥為咗向Tammy表愛意，就寫咗《美麗的你》同《So in Love》兩首歌喺婚禮上告白，佢話：「一直都想寫歌畀TamTam，3年前已經寫咗《So》，婚禮再寫《美》送畀佢，音樂對我哋好重要，佢鍾意我嘅其中一個原因，係睇到我keep住對音樂團火，《美》係講我哋嘅故事，自己中文唔係好叻，點知真係迫到去8、9月，因為搞結婚我哋經歷多咗，自己用15分鐘寫好呢首歌，我仲搵咗譚俊彥喺婚禮上彈solo，希望自己可以唱得好好畀TamTam聽。」
撰文：馮仁昭