「要知道傷心總是難免的，在每一個夢醒時分……」最後，選戰大奇蹟日始終冇出現，但一如曾俊華所講，呢場漂亮嘅仗佢都始終有打過。雖然提名得嗰165個，而最終得票365票，表面睇嚟好似都有收穫，但查實扣除近300張民主票，曾營原先預期嘅近百建制票最終都係得60至70張，部份仲係屬非傳統建制或非泛民嘅較中性票，如天主教選委同演藝界爾冬陞等。有建制派選委話，無論係咪支持薯片叔，噚日都陸續收到對方送上嘅親筆簽名致謝卡。
有心在曾營但身在林鄭營嘅建制選委就剝花生，為薯片叔分析死因，話薯片叔冇中央祝福，建制選委西瓜靠大邊就預咗，但薯片叔一直同政界中人唔算多來往，尤其同影響力舉足輕重嘅傳統建制派、傳統工商界等都唔算老友，亦有影響。

當年唐唐有義氣飛

佢以上屆唐英年為例，指唐唐喺西環打壓兼CY分薄票源下，仍然攞到285票，仲有絕大部份係建制派，令西環預計CY以逾700票當選嘅美夢成空，原因係唐唐同唔少建制派係老友，唔少人頂住壓力投咗「義氣飛」，既然同薯片叔唔算親密，就冇「撐老友撐到底」嘅動力，認為薯片叔少建制票，不無原因，仲話就連天字第一號薯粉田北俊都講過，同薯片叔其實唔算熟，只係公事上嘅朋友箒。
每逢賽後總會有檢討，至於分析係咪獨到，各隨所好，八方都馬後炮講句，當西環同左佬將薯片叔打成同民主派造反咁款，又點會唔動搖建制派暗票撐佢嘅定力？

李八方