巴西前鋒尼馬都可以話係今夏球壇大贏家，以破世界紀錄2.2億歐元（約19億港元）加盟巴黎聖日耳門（PSG），除稅後年薪就接近3千萬歐元（約2.6億港元），而且PSG又開季贏到唔識停，聯賽5連勝，周中歐聯又大炒些路迪，尼馬仲有咩不滿搞到唔開心呢？

據法國傳媒報導，尼馬不滿球隊對主射12碼嘅次序，PSG宜家安排烏拉圭前鋒卡雲尼係第1號劊子手，尼馬先係第2號，所以暫時聯賽入球，卡雲尼高達7個，尼馬先得4個，如果想刷數據，爭取金球獎，尼馬想連12碼都霸埋嚟射，睇吓教練艾馬利之後點安排嘞。