禁煙法例步入新階段，繼7.1擴展禁煙區至娛樂場所之後，9.1又開始派千五蚊牛肉乾。但新例唔止引起幾個部門前線執法員工不滿，一個只有初中程度嘅50幾歲燒焊工人都忍唔住出聲，寫咗封5,000幾字嘅長信畀煲呔同全體立法會議員，控訴禁煙法例掀起一場煙草文化大革命。

不似煲呔有魚養

呢位市民叫做區景良，佢封信有紋有路，講出70幾萬煙民心聲。佢話，每日辛勞總需要一啲心理支撐，唔係人人好似煲呔咁屋企有個水池可以養錦鯉陶冶性情。煲呔強推全面禁煙為走在世界禁煙潮流前列，卻必然物極必反。
區生認為，食煙係天賦人權，就算煙價加到咁貴，令煙民負擔非常沉重，但畢竟仲有自由吸煙空間，但全面禁煙係連最後嘅空間都扼殺埋。香港煙民大部份係勞動人口嘅中堅隊伍，唔少亦係一家之主、經濟支柱，自從不斷擴大禁煙，早就積聚滿腔怒氣。佢仲點醒煲呔，如果一個政府將和平理性嘅煙民逼到咁嘅地步，就係呢個政府政治生命完結之時。