組合農夫晏晝同埋少女標本現身尖沙咀出席活動，仲唱歌兼同樂迷玩遊戲。其中農夫透露獲曾志偉邀請入股一間幼兒教育中心，成員C君話:「正確嚟講係志偉哥益我哋，因為見陸永有兩個細路，而且我哋又有做兒童節目，所以就搵我哋。」

教育中心將會下周响九龍塘開業，佢哋話到時會親自落場：「我哋同志偉哥應該會教口才班，成間中心年齡由PlayGroup到小學都有。」陸永仲話會身體力行，帶自己囡囡落埋去。問到投資咗幾多？佢哋話:「好少啫，都唔夠一份首期。」

早前有網民發現新界東補選候選人楊岳橋同C君好似樣，對此C君話:「好多人都咁講㗎啦，網上一早說有人Share俾我睇。我自己說覺得唔係太似，反而梁天琦仲似陸永啦。」

陸永仲話初初睇到梁天琦嘅宣傳單張以為係自己，佢話:「咁咪幾好，我哋兩個人六號七號都齊晒啦。」兩個又話自己所屬票區係新界東，咁到時會唔會去投票呢？兩個一齊話:「呢樣梗係唔講得啦，連去唔去投都唔講。」新界東補選候選人仲有1號劉志成、2號黃成智、3號周浩鼎、4號梁思豪、5號方國珊、6號梁天琦及7號楊岳橋。