今日係陳慧琳（Kelly）嘅44歲生日，壽星女放假同家人慶祝，Kelly話：「今年生日好開心，收到唔少禮物，淨係容祖兒支咪（唱K神器K068）都收到三支，唔知係咪大家見我facebook貼老公唱Sam歌，囝囝跳晒舞啲片呢？所以都揀咗送咪畀我，仲差一支就可以全家大合唱開生日concert，兩個囝囝已經唱爆咪啦，做歌手嗰個反而搶唔到咪呀，自己都覺得有冇攪錯！」

Kelly話生日願望係自己同屋企人都身體健康，咁已經好幸福，直至今日佢已經食咗11個生日蛋糕：「唔會因為減肥唔食，一年先一次，冇所謂啦，最近成日巡迴，夠晒運動量，不停咁跳都可以keep fit，唔驚。」

上星期Kelly剛完成大馬雲頂「Let's Celebrate世界巡迴演唱會」，全場大合唱生日歌為佢預祝，完騷後歌迷仲送上榴槤蛋糕，令佢非常難忘。而今次Kelly個唱整咗新嘅Pokemon GO捉精靈片，着超級deep V戰衣戴上黑超，造型似足精靈「鐵腕」，Type仲改為『誰願放手』非常搞笑，當Kelly喺台上播片，台下就有歌迷用一個超大版紅色精靈球掟上台，好在Kelly手快接住，更開心大叫：「嘩！掟上嚟捉我？哈哈哈，好得意呀。」