好耐好耐冇行過catwalk嘅樂基兒，今日身穿性感內衣，帶領一眾索模喺W酒店行貓步。呂晶晶同師妹莊端兒齊齊以性感湯碗湯上陣睇騷，反而警鐘胸JC就收起性感，大為失色。

樂基兒今日呢身打扮都頗為性感，而且衫尾好長，佢笑言自己好耐冇行騷，希望唔會跌倒。問其今次出山係咪酬勞好吸引？樂基兒笑道:「呢啲不嬲唔講。」又話件衫唔算性感，因為有嘢遮住，唔算太透。

樂基兒又話平時有做運動，好似Yoga、wakeboard同跳舞，keep住身形。咁如果再性感啲行騷，好似著比堅尼咁，又得唔得？樂基兒最初話:「再著住行騷就未必得，影相就得。」

相當可愛率性嘅樂基兒本來是拒絕的，但聽到記者問「如果酬勞好呢？」咁樣樣，樂基兒態度即180度轉變，佢話:「其實泳衣我都成日著，如果著嚟行騷都OK。我喺印尼都成日著比堅尼，日日著，著咗兩年。」

同場嘅呂晶晶同師妹莊端兒月底就會拍諸葛紫歧投資嘅網劇，嘩，真係一聽個題材已知勁，呂晶晶形容係科幻題材，似X-menx狼人，有少少打鬥，晶晶仲有少少打戲，莊端兒就飾演反派，襲擊晶晶喎……

好，都係講番行騷。晶晶話今日只係同師妹嚟睇騷，佢都好想試下行，但係呢:「大前提係要有好價錢，高貴性感就可以，賣弄就唔得。」今日又咁性感？晶晶話:「今日睇場合，性感少少。」仲話老闆娘都唔知佢今日咁性感，希望見報後獲對方讚賞喎。