23歲美國男星安索艾果特（Ansel Elgort），入行多年以懵懵地嘅形象成功上位，佢同女星莎蓮活德麗（Shailene Woodley）合演催淚愛情片《生命中的美好缺憾》（The Fault in Our Stars）搞喊不少觀眾，兩人又合演電影《分歧者》（Divergent）系列，不過口碑新作《寶貝神車手》（Baby Driver）先稱得上係安索艾果特從影而來嘅代表作。

安索艾果特早前為《寶貝神車手》展開亞洲宣傳，仲帶埋女友Violetta Komyshan恩愛出巡，二人似乎最愛日本，安索更喺社交網上分享玩盡東京各地，原來佢係Pokemon粉絲，更四出搜購心頭好，仲着住比卡超公仔衫行街，認真大唔透。《寶貝神車手》本星期於香港上映，安索噚日仲有更新微博，點知佢竟留言：「狗糧好吃」嚇親唔少大陸網民及粉絲，亦冇人知究竟佢想表達乜嘢。