大城市無地起樓，解決辦法不外乎移山填海同鏟起舊區重建，後者响大陸叫做「舊改」。對內房嚟講，舊改土地成本相比起依家响公開市場向政府買地平，但煩在點樣令到舊區村民肯心甘情願畀塊地發展商，同埋會鎖住舊錢好幾年。須知道內房出名周轉快，由買地到賣樓嘅資金流往往以「月」計數，幾年時間夠佢哋做起幾個Project。

佳兆業（1638）响內地媒體有個朵叫「舊改之王」。呢個王者榮耀來自佢搞爛尾樓、舊改有一手，做咗廿年，同時响大灣區有2,990萬平方米舊改項目，屬於區內呢個範疇嘅大佬。

吸引舊區居民簽約收地嘅「法寶」之一，係描繪美好願景畀佢地。佳兆業響鹽田起咗幾幢外貌流線型、似足薄扶林貝沙灣嘅樓，屬於「回遷房」，即係賠畀原居民返嚟住嘅樓。外觀幾靚仔，入邊已經有重建戶住緊，內櫳就無緣份參觀。但至少第二個搞緊重建嘅舊區村民見到呢個樣板，或者會爽手啲簽約畀塊地佳兆業。

凡事有辣有唔辣，舊改項目用成本入賬，官地就用市值入賬，佳兆業CFO劉富强就覺得公司呢啲低成本靚土，因為咁而被嚴重低估價值，要不停同投資者講解批舊改貨實際上係有幾值錢，同公司依家目標每年轉化80萬平方米舊改地皮納入土儲。