煲呔正式表態參「選」，特區各股勢力亦處於備戰狀態，親中政黨想密謀架空奪權，提議每一個局設「政治顧問」！
乜唔係話嫌香港太過「政治化」咩？重政乜鬼治顧問？香港人要合力搞好經濟，咪搞咁多政治，局長設「政治顧問」，正一包藏禍心！
唔係局長唔夠政治化，而係老董留低呢篤三屍十一焗嘅蘇州屎，本身就太過政治化！若然十一局設晒政治顧問，顧問由政黨代表出任，坐晒喺行政會議，政府文件洩漏到滿天飛，重有乜保密制！個宴會廳咁焗，整多十一焗，人頭湧湧。
一有危機，各顧各，淨係識得自己揸個飯盒，唔肯同人夾餸，咁十一焗重留喺行政會議做乜？
十一焗要加插政治顧問？有啲人話畀八方知，都未必唔係好事，呢嗱，以下就係一張盲婚啞嫁嘅名單：
政務司司長許仕仁（政治顧問梗係鄭大班）、律政司司長梁愛詩（政治顧問梗係最有黃大仙草根支持嘅離婚九九八套餐之神謝偉俊），財政司司長唐英年（政治顧問就係查數最叻嘅劉慧卿）。

長毛輔助李國章

環境運輸及工務局局長廖秀冬（設政治顧問兩名：環保方面由「綠色人」周兆祥出任，而運輸嗰瓣，就梗係商台朝朝早監督緊交通嘅施南生）、財經事務及庫務局局長馬時亨（政治顧問詹培忠）、民政事務局局長何志平（民政事務範圍廣大，應設政治顧問三名：新界事務專業政治顧問簡炳墀、搶包山廟宇宗教信仰政治顧問釋洗塵，同埋同性戀反性傾向歧視問題政治顧問：彩虹戰士Tommy仔），廣播處處長朱培慶（政治顧問馬力）！
夠未？重有長毛梁國雄可以做教統局政治顧問，由拉丁美洲哲古華拉遠東傳人來輔助劍橋blueblood國際級貴族李國章一齊施政㖭！開設政治顧問？好吖，煲呔呀，快啲開位喇！

傳真︰2623-9278
電郵︰[email protected]