賭王何鴻燊子女眾多，99年以78高齡同四太梁安琪生下孻女何超欣，正所謂孻女孻心肝，深得賭王爸爸歡心，喺9歲時賭王曾公開讚囡囡「靚到不得了」。10年後嘅超欣，今年6月就剛滿19歲，壓軸登場嘅舞台唔係ball場名媛，而係個學界嘅「尖子」、「學霸」，舊年就考咗入美國麻省理工(MIT)， 超欣入咗MIT讀第一年大學，就對學生會事務有興趣，參選成為中國留學生會會長。

做了MIT中國留學生會會長，超欣就更上一層樓，代表MIT去參加同哈佛(Harvard)、耶魯(Yale)、普林斯頓(Princeton)同史丹福(Stanford)共5間名牌大學搞嘅五校同舟會學生組織，仲成為呢個組織嘅主席。上月12號，超欣率領咗100個學生去咗內地杭州，搞咗個中美學生3日交流會。平時低調嘅佢亦都因為呢個緣故，日前破例就接受咗《蘋果》獨家專訪，講返佢今次搞呢個活動嘅計劃。

呢5間美國名牌學府成立嘅五校同舟會就踏入第6年，今年就由超欣做主席，其中一個大活動，就係每年同五校嘅學生返內地做交流，除搞一啲嚟年迎新嘅學生歡迎活動，活動重點有一個論壇，邀請咗唔少學者同企業領導層嚟演講，例如今年就有劍橋大學教授David De Cremer、安永中華地區管理合伙人Michael Bi等，《福布斯》更首次成為呢個活動嘅合作伙伴。

身穿條子藍裙嘅斯文打扮嘅超欣，外型清純嬌滴滴，喺訪問時唔算好健談，仲有少少羞澀，說話一句起兩句止，一講到呢個會目的，佢就話：「去到我嗰年做，我就係第6年，五校係MIT、Harvard、Princeton、Stanford同Yale，當年呢五間學校嘅學生會就group埋一齊，想搞呢個會，想將學生帶返嚟中國，參加呢個活動，尤其是趁暑期，將我哋將入大學嘅本科生，同埋一啲在校生，一齊參加一個活動，喺暑假嗰陣搞3日。」

性格內向嘅超欣，去了美國讀了一年MIT大學生活，就走去做中國留學學生會會長，要自己寫proposal，講出自己理念，再由學生選出嚟，佢表示：「中學時候無乜呢方面諗法，大學入咗MIT環境有好多呢啲program leadership，我身邊朋友好多做呢樣嘢，就嘗試一下參加競選，咁啱就做咗。當時諗住可以嘗試吓，去選呀，呢個會喺新年、中秋節呀，大家一齊聚吓、食吓飯，都覺得幾有意義。」

由同校同學聯誼組織，跳到去做跨校文化交流聯校主席，呢個3日內地論壇活動就要籌備一年時間，佢表示：「花好多時間，成個活動準備周期一年，平時返學時候盡量做少啲，唔會影響到學業，我哋活動係8月份，所以6、7月比較heavy workload，前兩日係100人，到第3日論壇就嚟咗300人。」活動由酒店、交通、到娛樂節目、聯誼統籌都要安排，超欣表示：「我哋一年3日活動，其中最大係個forum，安排訂下酒店、安排下活動，好似我哋有個尋寶遊戲，好開心，好多嘢玩，希望畀學生有個交流嘅平台，將來希望五間嘅學生將來多啲交流，好似將來去Stanford旅行咁，都會有一班朋友，或者好似去咗成都，就會有group chat問人有無人喺度，可以約一齊出嚟食飯。」

活動重點就喺論壇演講，今年題目就係關於創業、創新，除邀請講師外，超欣要上台主講，佢說：「我揀返我哋學生要多啲creativity，要諗返未來教育、未來嘅學習呀，論壇有唔同嘅speech，例如有啲樣融合computer science、music、AI robotics等。自己都係第一次，比較緊張，安排所有活動已好忙，仲要準備個speech，又要包含每個學生講嗰嘢要有少少分別，唔好講埋同一樣嘅嘢。」提到有唔少大機構參加，超欣笑言：「好多都係第一次嘗試，好似美國Ernst & Young，內地華為等都係第一次，嘗試搵啲更大嘅企業去參加我哋活動，國際化啲，我哋都係美國嘅學生，希望globalize啲。」

精選娛聞，喺晒《娛果》
http://fb.com/appledailyent