每個看過羅老太年輕照片的人，都會有驚艷感覺，但老太嫁給羅鷹石前，原來雙方從未見面，都是奉父母之命、媒妁之言。羅老太說：「舊時冇得自己揀，都是由父母揀……鄰里介紹咗我呢個傻女畀佢。（對羅鷹石印象如何？）以前女仔睇男人，被人唱死呀！個人係跛腳，係獨眼，都係要嫁。」

「慳儉到夾死我」

老太及羅家都是泰國華僑，原籍潮州的羅鷹石，7歲跟老父到泰國掘金，17歲在父親身邊學習經營洋雜生意。1938年，羅鷹石帶着新婚的太太來港，與兄弟在文咸東街132號開設「羅瑞興」疋頭行，由零開始。「住大笪地，租間房14蚊，甚麼都放喺床下底。唔識朋友，唔識廣東話，家用就15蚊。（夠唔夠使？）要好慳，一日買3毫子餸，長豆兩三條，買粒咸蛋食兩餐」。
羅老太用「夾死我！」來形容這種慳，「佢錫唔錫我，我唔知，不過好慳儉，夾死我！我咁多仔女（六子三女），又叔仔（羅鷹石有六個弟弟要供養）。冇飲茶冇睇戲……冇做唔等使嘢。好在佢娶着我咁慳嘅，娶着第二個，走左囉！」這種慳儉硬朗的性格，傳了給子女，例如鷹君主席羅嘉瑞，「呢幾年嘉瑞朝早6點就起身游水，食22蚊早餐，好慳，好勤力！」