【特寫】
一間老舖，包含着多少心血及珍貴回憶。座落於西環東邊街逾40年的行李篋店「昌記」，老夥計譚伯（78歲）每日與東主蔡先生秤不離砣開店，多年來歷盡多少人事變遷。去年，有「攞命斜」之稱的東邊街接二連三發生意外，回望一年多前，譚伯卻淡然道：「搵食係咁，都唔驚得咁多。」　
記者：陳潔儀

去年4月，東邊街發生一死兩傷奪命意外，一輛滿載貨物的5.5噸吊臂車溜後撞入兩店舖造成慘劇，其中一名傷者正是譚伯。「當時見架車衝緊落嚟都知唔妥，我就企咗出嚟，點知架貨車直接撞落間舖度，附近欄杆撞到飛落我條腰度，不至於內傷，不過都瞓咗四日醫院。」譚伯巨細無遺地形容當日驚險一刻。

譚伯形容，年輕時於街邊當小販售賣乾貨，與行李篋店蔡老闆是「難兄難弟」，「日本仔打到嚟嗰時就識到𠵱家」，他更表示：「我哋以前捱過，試過好窮好窮，食兩餐都有問題，所以咩都見識過，由細嚇到大。」兩人識於微時，蔡於1970年於東邊街開舖，譚伯也順理成章與蔡老闆並肩作戰。
每日早上約10時，譚伯與蔡老闆前後腳抵舖，把行李篋、白飯魚、縮骨遮、毛巾等貨品整理好，然後開舖做生意，店內貨品各式各樣，琳琅滿目，實用又具歷史回憶。蔡老闆並在附近唐樓設有貨倉，偶爾要到貨倉搬貨到舖面補給，兩「兄弟」輪流看舖，除非有特別事，否則年終無休，惟「生意難做」，「遊客（光顧）反而唔多，幫襯嘅多數都係舊街坊，有啲搬走咗好耐都專登返嚟幫襯，所以喺度真係有晒感情！」譚伯笑說。
無奈歲月催人，隨着年月的洗禮，矢言守護老舖終老的譚伯坦言日漸吃力，而他的妻子和三名子女也勸他「收山」，「我真係有諗過唔做！不過始終人情難過，唔想扔低個老朋友（蔡生），大家話晒都拍檔咗咁耐，嘻嘻哈哈就一日！」他笑呵呵地說。

譚伯回首，40多年過去，附近一景一物早已物是人非，他無奈謂：「以前呢度（東邊街）好多排檔，附近有賣糖嘅、有藥房，仲有雜物店，幾十年前開始拆樓，街坊就各散東西，不過都冇辦法。」
一個行李篋、一對白飯魚，象徵點點老香港的珍貴歷史，譚伯盼於有生之年繼續與好兄弟蔡老闆「拍住上」，延續香港人的集體回憶。

社會服務
◆匿名投訴恕不處理。一經投訴，本報保留刊登權利
◆報料熱線：29290000
◆社會服務熱線：29908288
◆蘋果日報慈善基金：29908688
◆電郵：mailto:[email protected]
◆傳真：37112468
◆網址： http://charity.appledaily.com.hk